【Fraser Island火勢終於受控，但個景已唔同曬😭】
上星期講過，喺澳洲我最鍾意、有最深感情嘅地方Fraser Island，因為有人喺島上非法生火，導致火勢一發不可收拾。睇到呢單新聞堅唔安落，呢排都緊貼住佢消息。好在，最近當地終於落咗場大雨，令火勢受控。不過，呢場火燒咗島上超過50%地方，包括超過85,000公頃林木，更唔好講島上面稀有嘅生態物種，形成咗場生態災難。火勢受控後，預料好快可以再次俾遊客去Fraser Island遊覽，但景色從此唔一樣喇。
如我多次分享同小說所講，Fraser Island喺我心目中係個人間天堂，喺度生活咗兩個幾月，我最美好回憶就係一片青蔥雨林，仲有藍到好似假咁嘅湖泊同海；睇返啲新聞圖片，冇咗早前嘅猛火同濃煙，剩低已經變成殘枝枯葉，呢個有如大自然瑰寶嘅人間天堂、世界自然文化遺產，短時間內都幾難回復到正常面貌。
個post寫完後，估唔到有幾位讀者朋友，都同我分享佢喺島上面生活嘅點滴，係大家集體回憶。有人早過我、有人遲過我，工作環境同是是非非、種族歧視，來來去去都係果啲，做過，明嘅，待遇一回事，但大家只要喺度生活過，對呢度嘅感情同回憶，都係完全一樣。有位台灣讀者朋友表示做咗半年，已經係家嘅感覺，見到新聞真係喊咗出嚟。對於普通人嚟講，可能一個偏遠島嶼俾火燒咗冇乜感覺，但係對我哋嚟講，好似燒咗我哋一部份回憶咁。
雖然，搵資料睇唔到最熟最常去果幾個地方有冇受影響，我諗或多或少都會有。2020年我哋失去嘅嘢太多，希望場火真係受控，唔好又死灰復燃啦。
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
Search